Kawl Ralkap Ngian (Myanmar Military Deception) ျမန္မာစစ္တပ္၏စစ္ေရးပရိယာယ္

Kawl Ralkap Ngian

(Myanmar Military Deception)
ျမန္မာစစ္တပ္၏စစ္ေရးပရိယာယ္

Nihin Laimi social media tampi ah kan hmuh mi cu, Hakha ah Pu Tler Ling cu ralkap nih an tlaih i an hremnak ah anunnak aliam timi kong asi. Hi bantuk hi achuak chin lengmang lai, zeicatiah hihi Kawl ralkap nih kum sautuk an rak tuah mi mipi hremnak asi, Kachin, Karen, Shan, Rakhine pawl nih an rak tuar tuk cang mi asi.

Kawl ralkap hi China ralhrang lungput angei vemi an si caah minung hi afaak bik in hrem le thah hna khi midang nih kan țih hna seh tiah an kan hrocernak an hriamnam asi. Hrem le thah lawng asi lo, mi kar ah buainak tuah ti bantuk ngian (Deception) zong an thiam taktak. Hnulei caan ah ral an rak tuk dan zong hi an ngian arak țha bak fawn. Cucaah tutan ah mipi nih Kawl ralkap ngian an vun chuah thluahmah te ding hi ralring tein kan theih cia ah ațha.

Mipi nih Kawl ralkap ngian theih cia ding phun (5)

1. Ralkap le CDF kar ah i kahnak aum tikah ralkap nih hin mipi tam deuh an thih kha an i sel te lai i khuachung inn le lo, mipi umnak hmun pawl meithal kuan nih akhen khawh cemnak hmun ah khin ikahnak an tuah lai. Cu ti ikah ruang ah inn le lo, mipi kuanvai nih akhen hna ahcun cucu CDF an si tiah apuh hna lai i, National MRTV in an chim lai, inn le lo rawk mi le an i kahnak hmun pawl kha an langhter lai i ralhrang (အၾကမ္းဖက္သမား) pawl thil tuah asi ti khin an thanh len te lai.

2. Kawl ralkap nihin tiang an țhawn khawhnak cu an ral asimi hna an kong hlat-hlai (Intelligence-ေထာက္လွမ္းေရး) an thiam tuk mi hi asi. Cucaah atu ahcun CDF-ျပည္သူ႔ကာကြယ္ေရးတပ္- alutmi hna le thapetu pawl hi aho an si ti pawl kong khi ralkap nih an theih dih nawn cang hna lai. Cucaah Kawl Ralkap thawngpetu (Informant) asi tiah fiang tein theih mi hna cu afaak bikmi dantatnak pek hrimhrim hna ding an si.

3. Kawl ralkap uknak doh ding ahcun nunnak pek in doh ahau, anung incun i tlaihter hrimhrim lo ding. Pu Tler Ling an hrem dan hin tuak ah CDF maw, thapetu maw tlaih khawh sual hna ahcun thi lak hrem lo hmanh ah minung ah i chuah ti lo tiang in hremnak tuar țhiamțhiam asi lai caah nun buin ralkap nih tlaihnak cha cun nunnak pek in thih tiang doh lawlaw hna kha ațha deuh ko.

4. Mipi le CDF an i hmuh thiam lonak ding ah mipi nih kan upat ngaimi, kan țihzah ngaimi hna khi ralkap nih an kah hna lai i cucu CDF nih “Dalan” na si tiah an kah mi hna asi ti in CDF an puh hna lai, cu tikah mipi nih CDF hi nan luan cang, amah tiang hna thah cu tiah kanmah le kanmah kar ah buainak an tuah te lai.

5. Cun ralkap nih CDF nih kan ralkap le palik an thah mi hna, asi lo ah Palik, Ralkap Sakhan (ရဲစခန္း) an laak mi chungin hriamnam an zaam pi tiah thawng an i thanh cia hmasa lai i anmah nih mipi an thah ko mi hna kha ‘ hi nu/ hi pa kahnak ah an hman mi meithal kuan hi kanmah ralkap meithal kuan asi ko nain naite ah atlau mi, CDF nih an lak mi kha asi an ti lai. Cu pawl pin ah adangdang ralkap ngian (Deception) tampi aum rih.

Cucaah kan mifim, upatmi hna (khuanu/khuapa ah ruah mi) atulio ah dirhmun ngei loin ralkap lei bantuk, Chin mipi lei bantuk in adirmi hna (Papalak) pawl khi ralkap nih an ngian nunternak caah sahrawm ah thah an fawi te. Cu bantuk ngian cu achuak te lai i mipi nih ralkap ngian asi kha kan theih cia lo ahcun kan mah le kan mah chungah buai afawi tuk. Karen zong mah bantuk ngian khan anmah le anmah abuai ter hna i tamtuk an nunnak aliam.

Ral mei a alh cang lai caah hnawmtaam phunphun Kawl ralkap nih kan lak ah an vun luanter cang lai i cu tikah ralkap hnawmtaam an si ti kha fek tein mipi nih kan theih ahau i zei bantuk ngian hmanh chuah hmanh seh mipi dirkamhtu (Civilian Defence Force) he lu le pum bang țhen awk țha loin dir ko hna usih. Hi ralhrang uknak kan tei tikah cun atu CDF ram le miphun vengtu hna philhlonak lungphun cu ngan taktak in vulei dongh tiang hmun dingin kan khualapi khua laicer ah khin kan phun te lai. Photo (sample) ka vun tar chih mi bantuk hin….

Chungkhar, unau ti in dir caan asi lo, ram le miphun caah dir caan achuak cang!

 

Credit Victoria Khen Sang

Leave a Reply

Your email address will not be published. Required fields are marked *